रुपन्देही खबर , १६६ पटक हेरिएको
भैरहवा,असोज २३
रुपन्देहीको सिद्धार्थनगर नगरपालिकाका प्रमुख इश्तियाक अहमद खानले आफ्नो समस्या लिएर भेट्न आएका विद्यार्थीलाई सम्मान गर्नु भएको छ । मेयर खानले विद्यार्थीहरुको समस्या तत्काल समाधान गर्न निर्देशन समेत दिनु भएको छ ।
सिद्धार्थनगर नगरपालिका वडा नम्बर २ का कक्षा ५ मा अध्ययनरत अनिल गुप्ता र ८ मा अध्ययनरत राजिव गुुप्ताले सडकको समस्या लिएर मेयर खानलाई भेट्न गएका थिए ।
कार्यकक्षमा गुनासो लिएर आएका उनीहरुको समस्या तत्काल सम्बोधन गर्न नगर प्रमुखले सम्बन्धित शाखालाई निर्देशन दिनु भएको छ । मेयर खानले विद्यार्थीहरु भविष्यका कर्णाधार भएको उल्लेख गर्दै सानै उमेरदेखि समाजसेवाको भाव आउनुु, आफ्ना समस्या सरोकारवालासँग राख्न सक्नुु अझ सकारात्मक भएको उल्लेख गर्नु भयो ।
विद्यार्थीलाई सकारात्मक उर्जा प्रदान गर्ने एवं उनीहरुमा समाजसेवाको भावनालाई अझ विकास गराउने उद्देश्यले गुनासो लिएर आएका विद्यार्थीहरुलाई सम्मान गरिएको मेयर खानले जानकारी दिनु भएको छ । साथै उहाले हरेक नगरबासीका समस्याप्रति नगरपालिका संवेदनशील रहेको बताउनु भयो ।
विद्यार्थीहरुले मेउडिहवा जिसी पथमा कुलोको पानीका कारण करिब ३ सय मिटर क्षेत्रको बाटोमा आवतजावतमा समस्या भएको र उक्त क्षेत्र मर्मत गरिदिन आग्रह गरेका थिए ।
प्रकाशित मिति: २०२४-१०-०९ , समय : १०:२०:३१ , १ हप्ता अगाडि