रुपन्देहीमा टायल र पेन्टसहित ११ लाख ४७ हजार बढीको अबैध सामान बरामद

भैरहवा, जेठ २४

जिल्ला प्रहरी कार्यालय रुपन्देहीले जिल्लाको बिभिन्न स्थानबाट ११ लाख ४७ हजार भन्दा बढी मुल्य बरावरको अबैध सामान बरामद गरेको जनाएको छ । जिल्ला प्रहरी कार्यालय रुपन्देहीबाट खटिएको प्रहरी टोलीले सोमबार सिद्धार्थनगर नगरपालिका वडा नंम्बर ७ आवारोडबाट अबैध टायल बरामद गरेको छ । भारतबाट नेपाल तर्फ भन्सार छली चोरी पैठारी गरी लु १ ह २६४३ नंम्बरको अटो रिक्सामा भारत जिल्ला महाराजगंज थाना फरेन्दा घर भई हाल सिद्धार्थनगर नगरपालिका वडा नंम्बर १३ भैरहवा बसपार्क बस्ने वर्ष २४ को औरेन्ज चौहानले ल्याउदै गरेको ४ लाख ४० हजार मुल्य बराबरको २४ वटा पेटी टायल प्रहरीले बरामद गरेको हो । बरामद गरिएको अटोरिक्सा चालक, अटोरिक्सा र टायल आवश्यक कारवाहीको लागि भैरहवा भन्सार कार्यालय बेलहिया, रुपन्देहीमा बुझाइएको जिल्ला प्रहरी कार्यालय रुपन्देहीका प्रवक्ता तथा प्रहरी नायव उपरीक्षक डीएसपी श्यामु अर्यालले बताउनु भएको छ ।
यस्तै गरी जिल्ला प्रहरी कार्यालय रुपन्देहीबाट खटिएको प्रहरी टोलीले लुम्बिनी साँस्कृतिक नगरपालिका वडा नंम्बर १ भगवानपुरबाट अबैध काठका सामान, पेन्ट र टायल बरामद गरेको जनाएको छ । भारतबाट नेपाल तर्फ भन्सार छली चोरी पैठारी गरी लु १ च ३५२२ नंम्बरको बोलेरो पिकअप गाडीमा ल्याइएको ७ लाख ७ हजार ७ सय मुल्य वरावरको काठको ढोका ५ वटा, पेन्ट ३ बाल्टी ५० लिटर र टायल ४० पेटी र गाडी वरामद गरी आवश्यक कारवाहीको लागी भैरहवा भन्सार कार्यालय वेलहियामा बुझाइएको डीएसपी अर्यालले जानकारी दिनु भएको छ ।

प्रकाशित मिति: २०२३-०६-०७ , समय : ०८:४६:२४ , १ वर्ष अगाडि