रुपन्देही खबर , १५० पटक हेरिएको
काठमांडौ, चैत १६
राजसंस्था पुनःस्थापनाको माग गर्दै शुक्रबार काठमाडौंको तीनकुनेमा राजावादी समर्थकहरूले आयोजना गरेको प्रदर्शन उग्र बन्दा दुई जनाको ज्यान गएको छ भने ११० जना घाइते भएका छन् । हिंसात्मक बनेको प्रदर्शनका क्रममा १४ ठाउँमा आगजनी र १५ वटा सवारीसाधनमा तोडफोड भएको छ ।
काठमाडौं प्रहरीका अनुसार कीर्तिपुर नगरपालिका–४ गाम्छा बस्ने २९ वर्षीय सबिन महर्जनको कोटेश्वरस्थित झडपमा गम्भीर घाइते भएपछि शिक्षण अस्पताल महाराजगन्जमा उपचारका क्रममा मृत्यु भएको हो । यस्तै, एभिन्यूज टेलिभिजनका पत्रकार सुरेश रजक तीनकुनेस्थित मार्बल हाउसमा जलेको अवस्थामा मृत फेला परेका थिए । झडपका क्रममा ५३ नेपाल प्रहरी र २२ सशस्त्र प्रहरी गरी ७५ जना सुरक्षाकर्मी घाइते भएका छन् भने प्रदर्शनकारीतर्फ ३५ जना घाइते भएको प्रहरीले जनाएको छ ।
प्रदर्शनका क्रममा १५ वटा सवारीसाधनमा क्षति पुगेको छ । तीमध्ये ९ वटा सरकारी गाडी र बाँकी ६ वटा सरकारी वा निजी स्पष्ट नखुलेका गाडी छन् । प्रहरीले १४ ठाउँमा आगजनी र ९ वटा सरकारी तथा निजी कार्यालयमा तोडफोड भएको जनाएको छ । कोटेश्वरस्थित भाटभटेनी सुपरमार्केटमा भने प्रदर्शनकारीले लुटपाटसमेत गरेका छन् ।
प्रदर्शनका क्रममा तीनकुनेस्थित अन्नपूर्ण कम्प्लेक्स, मार्बल हाउस, कोटेश्वर महादेवस्थान, कोटेश्वर गणेश चोक, र भाटभटेनीनजिकै सरकारी गाडीमा आगजनी भएको प्रहरीले जनाएको छ । यस्तै, जडीबुटी उत्पादन तथा प्रशोधन केन्द्र, एकीकृत समाजवादी पार्टी कार्यालय, बालकुमारीदेखि काठमाडौंतर्फको करिडोर, बानेश्वर पुलपारिपट्टि, त्रिभुवन विमानस्थलनजिकको फोहोरा, इन्द्रेणी सहकारी कार्यालय रहेको भवन, रोयल रेस्टुराँ, र एरोम्याक्स कार्यालय भवनमा समेत आगजनी भएको हो ।
त्यसैगरी, अन्नपूर्ण मिडिया नेटवर्क तीनकुने, कान्तिपुर मिडिया हाउस बानेश्वर, केएमसी अस्पताल सिनामंगल, विमानस्थल अगाडि रहेको नयाँ भवन, सिनामंगलस्थित प्रहरीद्वारा जडान गरिएको दुईवटा सीसीटीभी क्यामेरा, प्रहरी बिट सिनामंगल, प्रहरी प्रभाग कोटेश्वर, ट्राफिक प्रहरी प्रभाग कोटेश्वर र समाजवादी पार्टी कार्यालय बागमती करिडोरमा तोडफोड भएको छ ।
प्रहरीले हिंसा नियन्त्रणका लागि बल प्रयोग गर्दा समेत प्रदर्शनकारी थप उग्र बनेपछि झडप चर्किएको थियो । प्रदर्शनकारीले तोडफोड र लुटपाट गर्दै सडकमा आगजनी गरेपछि तीनकुने, कोटेश्वर र बानेश्वर क्षेत्र पूर्ण रूपमा अशान्त बनेको थियो । प्रदर्शनका क्रममा घाइते भएका सुरक्षाकर्मी र प्रदर्शनकारीको विभिन्न अस्पतालमा उपचार भइरहेको छ भने स्थिति नियन्त्रणमा लिनका लागि प्रहरीले थप सुरक्षा सतर्कता अपनाएको जनाएको छ ।
प्रकाशित मिति: २०२५-०३-२९ , समय : २१:००:२३ , ४ दिन अगाडि