हरि शर्मा , १४० पटक हेरिएको
परासी, चैत ८
नवलपरासीमा सुकुम्वासी जग्गाको नापजाँच सुरु गरिएको छ। प्रतापपुर गाउँपालिकाको वडा नम्बर ९ बाट जग्गाको नापजाँच सुरु गरिएको हो। भूमि समस्या समाधान आयोग नवलपरासीले बिहीबारदेखि सुरु गरेको जग्गा नापजाँच जिल्लाभरी क्रमशः सुरु गरिँदै लगिने आयोगका जिल्ला अध्यक्ष लालबहादुर गुरुङले बताउनु भएको छ ।
भूमिहीन दलित, भूमिहीन सुकुम्वासी तथा अव्यवस्थित बसोवासीहरूको जग्गा नापजाँच गरिने छ। जिल्लामा २१ हजार बढीले जग्गाका लागि फाराम भरेका छन्। तीमध्ये अधिकांश जग्गाको यसअघिको आयोगले नापजाँच गरिसकेको छ।
करिब ८ देखि १० हजारको जग्गा नापजाँच गर्न बाँकी रहेको अध्यक्ष गुरुङले जानकारी दिनु भएको छ । यसअघि नापजाँच भएका जग्गाको पनि पुनः नापजाँच हुने उहाले बताउनु भयो । ‘यसअघि केही पुर्जा वितरण भएका छन्। केहीको नक्सा प्रमाणित नभएका र फिल्ड बुकमा कायम नगरेका जग्गा पनि छन्। सबैको प्रक्रिया पूरा गरेर पुर्जा वितरण गर्छौं,’ गुरुङले भन्नु भयो ।
असारसम्म ५ हजारलाई पुर्जा वितरण गर्ने गरी काम अघि बढाइएको उहाले बताउनु भएको छ । नापजाँचका लागि ३ जना अमिन र १ जना सर्वेक्षक रहेको आयोगले जनाएको छ। यसअघिको आयोगले ५१३ पुर्जा वितरण गरेको तत्कालीन आयोगका अध्यक्ष देवराज भण्डारीले बताए। करिब २१ हजारमध्ये ३ हजार छ सय कित्ता नापजाँच भइसकेको उहाले बताउनु भएको छ । फाराम भरेकामध्ये १० प्रतिशत जति भूमिहीन र बाँकी सबै अव्यवस्थित बसोवासी रहेको भण्डारीले बताउनु भयो ।
जिल्लामा सात पालिका छन्। तीमध्ये सबैभन्दा बढी बर्दघाट नगरपालिकामा ७ हजार २७० जनाले फाराम भरेका छन्। सुनवल नगरपालिकामा ७ हजार, सुस्ता गाउँपालिकामा २ हजार ४ सय, सरावल गाउँपालिकामा १ हजार ८ सय, प्रतापपुर गाउँपालिकामा २ हजार ९ सयले फाराम भरेका छन्। पाल्हिनन्दन गाउँपालिकाबाट फाराम भरिएको छैन। रामग्राम नगरपालिकाले तथ्यांक उपलब्ध नगराएको आयोगले जनाएको छ।
प्रकाशित मिति: २०२५-०३-२१ , समय : ०६:४३:०२ , २ हप्ता अगाडि