रुपन्देही खबर , २३५ पटक हेरिएको
नवलपरासी,माघ १४
नवलपरासीको सरावल गाउँपालिकाले आइतबार १५ औं गाउँ सभा तथा अधिवेशन सम्पन्न गरेको छ । गाउँपालिकाका अध्यक्ष सुखाडि प्रसाद चौधरीको अध्यक्षतामा १५ औं हिउदे अधिवेशन सम्पन्न भएको हो ।
सम्पन्न अधिबेशनले तीन वटा विधेयक पास गरी ऐनको रुपमा जारी गरेको छ । अधिवेशनले सभा सञ्चालन कार्यविधि २०८१, व्यवसाय कर व्यवस्थित गर्न बनेको विधेयक २०८१ र शिक्षा ऐन दोश्रो संशोधन २०८१ पास गरेको हो । सभा सञ्चालन कार्यविधि २०८१, वडा नं. ७ का अध्यक्ष ह्यात अलि खाँ धुनियाँले प्रस्तुत गर्नु भएको थियो भने व्यवसाय कर व्यवस्थित गर्न बनेको विधेयक वडा नं. ४ की सदस्य रञ्जना महतोले पेश गर्नु भएको हो । यस्तै शिक्षा ऐन दोश्रो संशोधन विधेयक वडा नं. २ का कार्यवाहक वडाध्यक्ष तुफानीलाल गुप्ताले सभामा पेश गर्नु भएको गाउँपालिकाका अध्यक्ष चौधरीले जानकारी दिनु भयो । सवै विधेयकहरु १५ औं गाउँ सभाले पास गरेको छ ।
सो अवसरमा उपाध्यक्ष वासमती हरिजनले चालु आ.ब.२०८१।०८२ को बजेट संशोधन प्रस्ताव र वडा नं. ३ का अध्यक्ष फिरङ्गी चौधरीले न्यायिक समितिको प्रतिवेदन प्रस्तुत गर्नु भएको थियो । सभामा प्रमुख प्रशासकीय अधिकृत विशाल मिश्राले चालु आ.ब.२०८१।०८२ को ६ महिनाको प्रगति समिक्षा प्रस्तुत गर्नु भएको गाउँपालिकाका योजना शाखा प्रमुख इश्वरी खनालले जानकारी दिनुभयो ।
सो अवसरमा गाउँकार्यपालिकाका सदस्यहरुले शुन्य समयको उपयोग गर्दै जनप्रतिनिधिहरुलाइ नेतृत्व तथा काम, कर्तव्य र अधिकार सम्बन्धी प्रशिक्षण सञ्चालन गर्नु पर्नेमा जोड दिएका थिए । यस्तै सेवाग्राही नागरिकहरुलाई सर्वशुलभ, छिटोछरिता र पारदर्शी ढंगले सेवा प्रवाह गर्न कर्मचारीहरुलाई सभासद गोरे राना मगरेले आग्रह गर्नु भएको छ । सभासदहरुले सरावल गाउँपालिका खेलकूदको उर्वर क्षेत्र भएकोले राष्ट्रिय स्तरका खेलाडि उत्पादन गर्न विद्यागत खेल प्रशिक्षण सञ्चालन गर्न जोड दिएका छन् ।
प्रकाशित मिति: २०२५-०१-२७ , समय : ०८:४१:२३ , २ महिना अगाडि