रुपन्देही खबर , १०१ पटक हेरिएको
भैरहवा, पुस १२
पक्लिहवा तथा श्री बहिरा बाल विद्यालय, सिद्धार्थनगर वडा नं २, जंगलटोल विच ‘मैत्रीपूर्ण भलिबल खेल सम्पन्न भएको छ । विद्यालयका प्रधानाध्यापक बसन्तकुमार बस्नेतको अध्यक्षता तथा विद्यालय व्यवस्थापन समितिका अध्यक्ष युवा समाजसेवी सुशील गुरुङ्गको प्रमुख आतिथ्यतामा भलिबल खेल सम्पन्न भएको हो । खेलको उद्धघाटन गर्नुहुदै प्रमुख अतिथि गुरुङ्गले भलिभल प्रतियोगिताले विद्यार्थीको शारिरीक विकास संगै बौद्धिक विकासमा समेत टेवा पुग्नुका साथै बिद्यार्थीहरुलाई मोबाइलको लतबाट केही भए पनि टाढा राख्न सकिने बताउनु भएको छ ।
भलिबल प्रतियोगिता विद्यार्थीहरु विचमा भातृत्व, परिचय, सिकाई, प्रविधिको परस्पर साटासाट गर्ने उद्देश्यले पक्लिहवा मा.वि.को खेल मैदानमा प्रतियोगिताको आयोजना गरिएको थियो । छात्र र छात्रा बिच सम्पन्न भलिबल खेलमा छात्र तर्फ बहिरा बाल विद्यालयका विद्यार्थीहरुले पक्लिहवा मा.वि.लाई २५–१७, २५–१६ र छात्रा तर्फको खेलमा बहिरा बाल विद्यालयले पक्लिहवा मा.वि.लाई २५–१०, २५–१६ को सोझो सेटमा पराजित गरेको थियो । रेफ्रीको भूमिकामा शिक्षक विष्णु पन्थ, सहायक रेफ्रीमा शिक्षक गोविन्द गौतम, स्कोरमा शिक्षक प्रकाश भूर्तेल, लाइन्स मेनमा राज कुमार र जे.पी.मिश्रा रहनु भएको थियो । प्रतियोगितामा बहिरा बाल विद्यालयका प्राचार्य भिम बहादुर थापा, पक्लिहवा मा.वि.का उप–प्राचार्य शेर बहादुर थापा, समाजसेवी अनिल कुमार के.सी., तेजेन्द्र गुरुङ्ग, मनिषा थापा लगायतको सहभागिता रहेको थियो भने अब अर्को चरणको भलिबल खेल क्रमशः बहिरा बाल विद्यालयको प्राङ्गणमा गरिने आयोजकले जनाएको छ ।
प्रकाशित मिति: २०२४-१२-२७ , समय : ०८:५१:०१ , १६ घन्टा अगाडि